Герман төдийгүй дэлхийн олон улс орны боловсрол, улс төрийн шийдвэр гаргагчид урлагийн боловсролд ихээхэн анхаарлаа хандуулж байна. ХБНГУ дахь Монгол Улсын Соёлын Элч О.Оюунтуяа болон Берлин хотын Шарлоттенбург-Вилмерсдорфын хүүхэд залуучуудад зориулсан урлагийн сургууль (JKS CW) нь хамтын ажиллагааныхаа хүрээнд Улаанбаатар хотноо зохион байгуулагдсан хүүхэд, өсвөр үе, залуучуудын урлагийн боловсролын “KUNSTFEST für KIDS – ХУН” төслийг санаачлан хэрэгжүүлж эхлээд байна. Энэхүү урлагийн боловсролын дөрвөн шатлалтай, цуврал хөтөлбөр, арга хэмжээ бүхий ХУН төсөл нь хоёр орны урлагийн боловсролын багш, мэргэжилтэн, сурган хүмүүжүүлэгч, уран бүтээлч, хүүхэд, өсвөр үе, залуучуудыг өргөн хүрээтэйгээр хамруулж, мэргэжлийн туршлага солилцоог тогтвортой хөгжүүлэх боломжийг хангаж байгаагаараа онцлог юм.